Nagpirma sang pagpahanugot sa surveillance testing batok sa COVID-19 ang napulo ka mga presidente sang nagkalain-lain nga market vendors association sa ciudad sang Bacolod.
Suno kay Executive Assistant to the Mayor Ernie Pineda, nagpirma ang mga ini sa pag-ugyon sa ciudad kaupod sang presidente sa Bacolod Flower Vendor Association kag Manokan Country Vendors Association.
Nagapati ang mga ini nga ang surveillance testing ang para man sa kaayuhan sang mga market vendors agud nga makaseguro sang ikaayong lawas kalakip na ang pamilya.
Nag-ugyon ang mga ini bangod luyag nila nga maseguro nga hilway na sa COVID-19 virus ang merkado.
Ginakahangaw-an man sang mga pinuno nga may malatnan sa mga ini kag madala sa panimalay kag kumunidad.
Nakita sang mga ini nga mas makaimbetar ang mga ini sang dugang nga customer bangod nakaseguro kag mapadayaw nga negatibo na ang mga ini sa virus.
Sa karun nagahanda naman ang mga market supervisor para sa nagahilapit nga surveillance testing sa Sabado kasubong man ang mga kapulisan nga magapatuman sang katawhayan sa operasyon.
Ginapasalamatan man ni Pineda ang mga ginpadala sa ciudad, nagikan pa sa Cebu agud nga magpanguna sa swab testing kadungan pa sa pagdonar sang 10,000 ka mga dugang nga test kits.Padayun naman ang mga ini sa pag-enganyo sa mga pumuluyo kag nakita nga kalabanan ang nakahangop na.
