Tatlo tanan ka ash emissions ang nagluntad sa Bulkan Kanlaon kahapon, Abril 14.
Sa interview san Bombo Radyo Bacolod kay Ptolomey Mañego, Assistant Science Research Specialist sang PHIVOLCS Kanlaon Volcano Observatory, una nga narecord ang ash emission alas-11:52 kahapon sang aga nga tubtob alas-2:12 sang hapon, kun sa diin nagdangat sa 200 tubtob 800 meters ang kataason sang ginbuga nga abo.
Liwat nga nagbuga sang abo ang Bulkan alas-2:53 sang hapon nga nagdugay tubtob alas-3:34 sang hapon kag ini ang nagdangat sa 600 meters nagikan sa summit crater.
Suno sa PHIVOLCS ang abo ang ginpalid padulog sa west-northwest nga dereksyon.
May nagluntad pa nga ikatatlo nga ash emissions alas-5:17 sang hapon.
Suno kay Mañego mas madamol ang abo nga ginbuga sang bulkan kahapon sang aga kun ipaanggid sang hapon.
Nakaeksperyensya sang light ashfall ang pila ka Barangay sa La Carlota City kag Bago City.
Dugang pa sini bisan holiday bangud sa Semana Santa ang PHIVOLCS ang padayon nga nagabantay sa aktibidad sang Bulkan Kanlaon ilabi na nga may minor explosive eruption sang Abril 8 kag asod-asod nga ash emissions nga mahimo magresulta sa magmatic eruption.
Pahanumdom ni Mañego sa mga residente nga padayon nga mag-aligmat kag sundon ang tanan nga pagsulundan sang mga otoridad agud nga masiguro nga hilway ang tanan.
Nagapabilin sa Alert Level 3 ang Bulkan Kanlaon kag wala sa gihapon ginapahanugutan ang pagsulod sa 6-kilometer Extended Danger Zone sang Bulkan.
