Nagdangat na sa halos 20,000 ang napagwa nga QR Coded Person’s With Disability (PWD) ID sa Bacolod City.
Madumduman nga nakaligad nga tuig, ginpabawi ni Bacolod City Mayor Alfredo “Albee” Benitez ang mga PWD IDs, agud maislan sang QR Coded IDs matapos ang reklamo sang mga business owners sa pagduging sang mga nagagamit sang peke nga PWD IDs.
Nahibaluan nga may ara sang mga ginahatag nga discounts partikular na sa groceries kag bulong para sa mga PWD ID holders.
Sa pagtakop sang tuig 2024, yara na sa masobra 15,000 ang mga narelease nga QR Coded PWD IDs.
Ang inisyatibo ang ginpresentar sang alkalde sa national officials samtang ang National Council for Disability Affairs ang nagpabudyat nga luyag i-adopt ang QR Coded PWD IDs nationwide.
Kasunod sini, nagpadala naman sang memorandum sa nagkalainlain nga local government units sa implementasyon sang proyekto.
Sa interview sang Bombo Radyo Bacolod kay Alma Gustilo, head sang Disability Affairs Office sang Bacolod City, nagdangat na sa 19,802 ang mga narelease nga QR Coded PWD IDs.
Ginapakamaayo sini nga nagdyutay na ang nagakabatun nga reklamo sang peke nga PWD IDs bangod may paagi na sa pagseguro kun lehitimo ang ginpresentar sang customer.
Suno kay Gustilo, plano sang NCDA nga magpagwa sang National format sang QR Coded PWD IDs agud mangin identical na lamang sa tanan nga LGUs.
