Ginhatagan sang cash assistance ang suldado nga napilasan kadungan sang engkwentro nga nagluntad sa tunga sang 79th Infantry Battalion kag mga miyembro sang New People’s Army Sa Barangay San Isidro, banwa sang Toboso sang Biyernes Santo.
Suno kay 79th IB commander Lt. Col. J-Jay Javines, sa paa ang pilas sang suldado kag napaidalom na ini sa operasyon.
Mismo si 303rd Infantry Brigade commander Col. Orlando Edralin ang naghatag sa iya sang Wounded Personnel Medal samtang yara ini sa ospital kag ginhatagan man ini sang cash assistance.
Sa karon, nagapadayon pa ang pagpatrolya sa lugar samtang may mga impormasyon man nga nagatuhaw nga may napilasan sa mga rebelde apang indi pa ini kumpirmado.
Narecover sa encounter site ang duha ka home made shotgun nga may mga bala kag iban pa nga personal nga kagamitan.
Suno kay Javines, indi magnubo sa 10 ka NPA members ang ila nga naengkwentro apang gilayon man nga nagpalagyo.
