Naglab-ot sa kapin 219 ka indibidwal ang pilason sa nagluntad nga riot sa France matapos ang pagdaug sang Paris Saint-Germain batok sa Arsenal sa Union of European Football Associations (UEFA) Champions League finals, santo sa mga otoridad.
Suno sa Interior Ministry, walo ka tawo ang seryoso nga nasamaran samtang 57 naman ka kapulisan ang pilason.
Indi magnubo sa 800 ka persona ang gin-aresto bangud sa nagkalain-lain nga paglapas sa layi kalakip na ang pagpanakit kag pagpangguba sang mga propidad.
Makit-an man sa mga video footage ang pagpalupok sang mga flare gun, pagsunog sang mga electric bike sa kalsada, kag paggamit sang tear gas sang kapulisan.
Naglapta naman ang mga otoridad sa Paris agud kontrolon kuntani ang kinagamo apang nangin mabudlay ini gani nagresulta sa mabug-at nga lakat sang trapiko kag lapnagon nga riot sa pila ka mga lugar.
Samtang, nagapadayon pa ang imbestigasyon sa pagkapatay sang isa ka 24-anyos nga lalaki sa Paris ring road samtang ginpatigayon ang selebrasyon sang kadalag-an sang PSG apisar yara sa idalom sang hugot nga seguridad.
