Ginahulat pa nga maretrieve sang Scene of the Crime Operation (SOCO) ang nasapwan nga bangkay sang bata sa higad sang sapa sa Prk Sto Domingo, Brgy Handumanan, Bacolod City agud matumod kun ini ang namissing nga 5 anyos sa Purok Manville Phase 6A Brgy. Handumanan, sang Disyembre 21.
Sa interview sang Bombo Radyo Bacolod kay Jeymar Blancada, nakakita sang bangkay, sila ang masami nagapamahaw sa balay sang iya ugangan sa tupad lamang sang sapa.
Sang siya ang magpangihi kapin alas-10:00 subong nga aga, natalupangdan sini ang tiil nga kaangay sang iya ka bata.
Gilayon sini nga gintawag ang iya asawa nga amo ang nagcontact sang Barangay Officials.
Gilayon man nga nagpadulong sa lugar ang mga himata ni Quenie Aguirre, ang 5 anyos nga bata nga babayi nga una na nga ginpanawagan sa Bombo Radyo Bacolod nga namissing sang Disyembre 21 sang hapon.
Sa interview sang Bombo Radyo Bacolod kay Mary Rose Acostan, tiya ni Quenie, indi pa nila makumpirmar kun ini gid man ang bata bangod natabonan sang mga dahon ang lawas kag indi na makilala ang nawong bangod may buka sa ulo kag nagaka-agnas na.
Apang ang itom nga palda kag ang kadakuon sang bata ang kaangay kay Quenie.
Ginahulat nila nga maka-abot ang SOCO kag mapatakas ang bangkay agud matsekyar kun kaangay ang panapton, sa yellow nga may buho-buho nga desinyo sa madula ang bata.
Apang kun ini gid man ang iya hinablos, ginakatingala ni Acostan kun paano nakalab-ot sa area ang bata nga kapin kilometro na ang kalayuon.
Suno diri, apisar nga tupad sang sapa ang ila nga balay, wala makita nga senyales nga may nakadanlog sa pangpang.
Ginhusoy man sang mga pakaisahan sang bata kag mga kaingod ang sapa apang ini ang wala makita.
Suno kay Acostan kun nahulog sa sapa, may-ara sang nagabaral sa isa ka taytay nga masab-itan sang bata.
Aminado ini nga nagsaka gid man ang tubig sa sapa sang Disyembre 21 bangod sa pag-ulan ulan apang ini ang katunga lamang kag wala man nag-awas.
Suno diri, mahibaluan sa eksaminasyon sang SOCO kun ano ang kinamatay sang bata, kag kun may posibilidad nga may nagtandog diri.
Pahayag ni Acostan nga nagatinguha ang iloy sang bata nga nagapangamo sa Manila nga makapauli, apang kagab-i lamang na swelduhan kag kulang sa pamasahe, apang nagapangita ini sang paagi agud makapauli kag makabulig kuntani sa pagpangita sa iya bata.
Ang amay ni Quenie ang nagtaliwan duha na ka tuig ang nakaligad.
