Padayun ang search and rescue operation sa mga namissing, samtang wala pa natumod ang rasun sa pagkasunog sang passenger vessel MV Jun Aster sa coastal water sang Coron, Palawan Alas-6:45 kagab-i.
Sa interview sang Bombo Radyo Bacolod kay Commodore Noemie Cayabyab, spokesperson sang Philippine Coast Guard, ala-1:00 subong nga hapon, lima ang narecord nga napatay, 43 ang survivor, kag may 86 pa nga nagapabilin nga missing.
Kabulig man sang PCG, ang Bureau of Fire Protection, Philippine National Police, Philippine Army, Coron Municipal Government, Municipal Disater Risk Reduction and Management Office, kag bisan ang mga private resort owners nga nagpahulam sang ila nga mga floating assets.
Pahayag ni Cayabyab nga wala pa ginpahanugutan nga masulod sang Coast Guard personnel ang barko bangod ini ang naga-aso gihapon kag ginakahangawa nga masuffocate ang mga responders.
Apang sila ang nakapamangkot sa isa sa mga survivors nga nagpahayag nga nag-umpisa ang kalayo sa Cargo hull, nga nagaserbe nila nga lead.
Samtang padayun man nga nagakaanod ang barko, kun sa diin ini ang yara sa 4 nautical miles gikan sa baybayon sang Brgy Marcilla sang mag-umpisa ang kalayo, apang ala-1:00 subong nga hapon ini ang yara na sa 7.6 nautical miles.
Ginapakamaayo ni Cayabyab nga nagakoordinar man ang shipping company, kag nagabulig sa mga biktima.
Naghatag naman sila sang commitment sa pagbulig sa pagpabulong sa mga gindala sa ospital.
Suno kay Cayabyab, sa manifest list 117 ang pasahero kag 17 ang crew sang barko.
Padayun pa ang ila search and rescue operation sa paglaom nga nakasaboy lamang sa kalapit nga coastal area ang iban nga pasahero.
May gintukod naman nga command post sa area, nga mahimo mapadulongan sang mga may ginapangita nga himata.
Panugyan man nila nga magparecord kun may nakita na nga himata sa command post.
Nagapati si Cayabyab nga may salabtun ang shipping company sa insidente, apang ang kabug-aton sang penalidad ang nakadepende pa sa imbestigasyon.
