Welcome development para sa General Alliance of Workers Association (GAWA) ang 3-year pension hike sang Social Security System (SSS).
Sa announcement sang SS, umpisahan ang pension hike sa Setyembre 2025, kun sa diin magadangat sa 3.8 million nga pensioners ang ginalauman nga makabenepisyo.
Amat-amat ang pagpatuman kada tuig tubtob malab-ot ang 33 percent increase para sa pension sang retirement kag disability pensioners samtang 16 percent naman ang isaka sa death ukon survivor pensioners.
Sa interview sang Bombo Radyo Bacolod kay GAWA Secretary General Wennie Sancho, puro lamang promisa ang ginhatag sang nakaligad nga administrasyon sa mga retirees.
Gani nagakalipay sila nga apisar magamay, may-ara sang magatupa nga pagsaka sa pension.
Suno kay Sancho, may-ara sang formula ang SSS sa pagsuma sang pension, apang kuntani ginkonsiderar man sa increase ang inflation kag matuod nga value sang piso.
Apang welcome development na para sa mga pensioners ang gamay nga pagsaka.
Suno diri, bangod magamay lamang ang sweldo sadto, gamay man ang pension sang madamo nga retirees, nga kulang pa sa pagbakal sang bulong.
Dugang pa sini nga ang pension sang madamo nga mga retirees ang indi lamang para sa ila kaugalingon bangod ini ang ginabulig man sa apo ukon sa mga kabataan nga may kabudlayan sa pinansyal.
Pinaagi sa pagpasaka sang pension, ini ang makapasaka man bisan paano sa purchasing power kag consumer spending sang mga retirees.
Suno kay Sancho, nagakadapat lamang nga ihatag sa mga pensioneer ang mga nagakadapat para sa ila bangod ini ang makabig bunga na sang ila pagpangabudlay sang tion nga sila ang may ikasarang pa.
