Padayon pa ang imbestigsayon agud matumod ang tatlo ka suspetsado nga nagpatay kay Alex Dolorosa, 35-anyos, call center agent kag residente sang ciudad sang Cadiz.
Si Dolorosa ang isa ka labor activist kag paralegal sang BPO Industry Employee Network (BIEN).
Siya ang nasapwan na lamang nga wala sang kabuhi sa sulod sang payag-payag sa Villa Rosario Street, Barangay Alijis, ciudad sang Bacolod sang Abril 24 sang aga kun sa diin may madamo ini nga pilas tuga sang pagbuno.
Ginmanduan sang Department of Justice ang National Bureau of Investigation Bacolod nga patigayunan sang parallel investigation ang pagpatay kay Dolorosa.
Suno kay NBI Bacolod chief Atty. Renoir Baldovino, sa imbestigasyon, Abril 23 sang gab-i nakita si Dolorosa nga nagakaon sa isa ka inasalan sa tabok sang Bacolod City Goverment Center sadtong ulihi nga gab-i sang Panaad Festival 2023.
Ini ang dason nga nakit-an santo sa CCTV footage nga kapin alas 12:30 sang kaagahon sakay sa motorsiko sini nga may angkas nga lalaki samtang nagasunod sa motorsiklo nga may duha man ka lalaki nga nagasakay.
Santo sa CCTV wala man ginpahog, ginsakit ukon ginpilit ang biktima sang tatlo ka mga lalaki gani suno kay Baldovino, dako ang posibilidad nga kakilala ukon grupo ni Dolorosa ang mga suspetsado kasubong man nga pamilyar sa lugar ang mga ini.
Samtang, ginlanatw nga pagpangawat ang motibo sa pagpatay sa bikitma nga tubtob sa karun wala nakita ang wallet, cellphone kag motorsiklo sini.
Ginklaro man ni Baldovino nga ang pagpatay kay Dolorosa ang indi kahimuan sang hired killer kag wala sang kaangtanan ang trabaho sini bilang paralegal sa nagluntad nga krimen.
