Nagahulat pa ang National Food Authority Negros Occidental sang pagsulundan angot sa bag-o nga purchasing price sang gobyerno sang humay.
Santo sa announcement sang Malacanang kahapon, nagtalana ang NFA Council sang P19 to P23 nga purchasing price sang dry palay kada kilo, samtang ang wet palay naman ang baklon sang P16 to P19.
Sa interview sang Bombo Radyo kay NFA Negros Occidental provincial manager Glenda Paz, nagahulat pa sila sang internal guidelines nagikan sa NFA Central Office kun paano ideterminar ang humay nga magabili sang P19 to P23.
Sa karon, ang NFA ang nagabakal sang humay sa presyo sang P19, clean and dry, 14 percent moisture content.
Apang nagabaton man ang NFA sang segunda mano, apang nagavary ang presyo, depende sa moisture content.
Sa iban nga bahin sang pungsod nga may yara sang bastante nga post-harvest facilities ang NFA, nagabakal ang ahensya sang fresh sa thresher nga humay apang wala naman nagabakal sini ang NFA Negros Occidental bangud sa kakulang sang pasilidad.
Suno kay Paz, pagasundon nila ang guidelines angot sa pagdeterminar sang humay nga dapat baklon sa presyo nga P19 to P23.
Subong nga tuig, 60,000 bags ang target nga baklon sang NFA Negros Occidental kag 106,000 bags naman para sa masunod nga tuig.
Suno kay Paz, may mga bodega ang NFA Negros Occidental sa Dancalan, Ilog; sa Gatuslao Street kag sa BREDCO Port sa Bacolod; sa San Carlos City; samtang nagbutang man sang buying station sa Valladolid; kag magapangita pa sang dugang nga bodega kun madamo ang humay.
Santo sa estimate, 7 million bags sang humay ang ginaproduce sang bilog nga Negros Occidental apang 10 percent lang ang nagasulod sa NFA ukon 60,000 bags.
