Magapadayon ang national government sa pagbutang sang pondo agud nga mapadayon ang pag-ubra sang Bacolod City General Hospital.
Sa interview sang Bombo Radyo Bacolod kay Bacolod City Lone District Congressman Greg Gasataya, sang Martes, nakigkita na ini kay Health Secretary Ted Herbosa kun sa diin ginhatag sini ang design nga ginhimo sang construction company nga nagdaog sa bidding sa pagpatindog sang ospital kaupod ang request sa padayon nga paghatag sang pondo sa nasambit nga proyekto.
Suno kay Gasataya, nakadownload na ang national government sang P250 million para sa Phase 1 sang Bacolod City General Hospital.
Nagdugang man sa pagbutang sang pondo ang Department of Public Works and Highways (DPWH) para sa nasambit nga ospital.
Bangud katubuhan ang ginapatindugan sang ospital nagbutang sang backfill ang DPWH kag nagbutang sang dalan sa sulod sang ospital.
Sa karun nagapadayon sa karun ang pagpatindog sang mga ancillary buildings sang ospital santo man sa requirement sang Department of Health.
Madasig man ang pag-ubra sang ospital kag ginalantaw kag ginalauman nga mangin operational na ini sa 2025.
