Gin-athag sang Regional Corporate Communications Head sang National Grid Corporation of the Philippines (NGCP) Western Visayas nga ang abiso nga yara sa Red Alert ang NGCP ang bangod nga wala na sang reserba nga supply sang kuryente.
Sa interview sang Bombo Radyo kay Michelle Visera, una nga nag-issue sang Yellow Alert ang NGCP matapos nga may pila ka mga power plant nga nag force outage.
Nag-abiso sila sang Yellow Alert Status bangod nga may yara pa sang gamay nga supply nga nabilin, apang ang pagpagwa nila sang Red Alert Status ang nagapahayag nga naubos na ang reserba nga supply sang kuryente.
Suno diri, dako nga posibilidad nga maeksperyensyahan ang pagkadula sang kuryente sa pagpagtuman sang manual load dropping.
Nagpasalig naman ini nga padayon ang ila monitoring sa pagbalanse sang demand kag supply sang kuryente nga mahatag sa mga nagkalain-lain nga electric cooperatives.
Ginalauman naman sini nga subong nga adlaw, nga mabalik na ang pag-operate sang mga planta kag amo naman nga magapagwa ang NGCP sang abiso sa oras sang connection.
Mensahe ni Visera, nagabantay ang NGCP, electric cooperatives kag power plants sa sitwasyon kag handa nga magresponde inkaso nga may mga unscheduled power interruptions.
