Ginbaha ang National Highway sang Barangay Vista Alegre padulong sa Barangay Dancalan sa banwa sang Ilog bangod sa tayuyon nga mga pag-ulan sang aga.
Sa interview sang Bombo Radyo Bacolod kay Ilog Local Disaster Risk Reduction and Management Office head Gideon Padilla, sang aga ang mga matag-as lamang nga salakyan ang makalabay sa area.
Suno diri, bangod sa baha, indi makatabok ang mga motorsiklo, tricycle pati na ang mga awto.
Ang baha sa dalan ang nagalawig sang kapin 200 metros lamang.
Pahayag ni Padilla nga gikan sa kabukiran sang ciudad sang Kabankalan ang tubig nga nagapanaog sa Ilog river.
Ginpasalig naman sini nga waka pa sa critical level ang volume sang tubig sa suba, kag wala pa ginakahangaw-an nga mag-awas.
Panawagan ni Padilla sa mga nagapuyo sa lower barangay nga ipatakas na ang mga butang nga kinahanglan ipatakas kag mag-impake na sang dalal-on inkaso magpatuman sang preemptive evacuation.
Aminado ini nga indi malikawan ang baha sa banwa sang Ilog ilabi na kun mag-awas ang Ilog river, gani sila ang permi preparado.
Suno diri may 15 ka Barangay sa Ilog, 11 diri ang low lands samtang yara naman sa nabukid ang apat.
Activated naman ang mga evacuation centers sa tagsa ka Barangay lakip na ang ila koordinasyon sa Department of Education sa paggamit sang classrooms bilang evacuation center kun kinahanglan.
Sila ang magapanilag man sang tiyempo kun ipadayun ang suspension sang face to face classes bwas.
Pahanumdom sang alkalde nga mag-aligmat sa tiyempo tubtob sa Sabado, samtang ang mga nagahubog sa baha ang dapat naman nga magdangop sa Barangay Health Centers agud mahatagan sang bulong batok sa leptospirosis.
