Nagpasalig ang national government nga magahatag sang duha ka semana nga moratorium sa pagpauli sang mga Locally Stranded Individuals (LSI) agud makapreparar man ang mga Local Government Unit (LGU) sa mga quarantine facilities.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, indi pa man mapat-od sang national government kun san-o maumpisa ang moratorium apang nagpasalig si Department of the Interior and Local Government (DILG) Secretary Eduardo Año nga magahatag sang moratorium nga duha ka semana para sa pagpauli sang mga LSI kada bulan.
Ginpahayag man ni Lacson nga aminado ang national Inter-Agency Task Force (IATF) nga wala na-manage sang maayo ang mga LSI nga ginbutang sa Rizal Memorial Sports Complex sa Manila agud maka-avail sang Hatid Tulong Program sang gobyerno.
Suno kay Lacson, tres mil ka mga LSI nationwide ang ginalauman sang IATF apang siyam ka libo ang nag-abot agud mag-avail sang libre nga sakay agud makapauli paagi sa hatid tulong program sang gobyerno.
Ginbaton man sang nagafacilitate sang programa bangud nakita sang mga ini ang makalulu-oy nga sitwasyon sang LSI.
Ginpahayag man ni Lacson nga sarang matuman ang duha ka semana nga moratorium magluwas na lamang kun magmando ang presidente nga papaulion na ang mga LSI sa tagsa ka probinsya kag indi na pagtumanon ang moratorium.
