Para sa labor advocate, ang National Minimum Wage System ang isa sa mga tikang nga makapa-uswag sa Pilipinas.
Sa interview sang Bombo Radyo kay General Alliance of Workers Association (GAWA) Secretary General Wennie Sancho, naaprubhan na sang Committee on Labor sa House of Representative ang National Minimum Wage Bill kag ginalauman nga pirmahan sang Presidente agud ma-implementar.
Suno kay Sancho, madugay na ini nga panawagan sang labor sector, partikular na ang “equal work, equal pay” nga prinsipyo.
Pahayag sini nga sa bahin sang mga mamumugon, tuman ini ka importante nga tikang para patas nga pangalabuhian.
Apang suno diri, kinahanglan bantayan ang epekto sini sa inflation, gani ginalantaw sini nga kinahanglan ang transition period sa sulod sang tatlo ka tuig agud ma-usisa ang epekto sini sa ekonomiya.
Ginpahayag ni Sancho nga importante diri ang papel sang gobyerno kun paano ini maaprubahan kag ma-implimentar sang husto ang nasambit nga hagna para sa kamaayuhan sang tanan.
