Ginpahanumdom sang National Police Commission nga isa ka criminal kag administrative offense ang pagpanakit sang menor de edad kaangay sang ginhimo ni Police Staff Sgt. Harry Gonzaga.
Suno kay NAPOLCOM Region 6 director Atty. Joseph Celis, pagalantawon niya ang video agud nga mavalidate.
Apang kun basehan ang rules, isa ka offense ang pagpanakit sang menor de edad, indi lang sa criminal aspect kundi pati sa administrative aspect of the law.
Suno kay Celis, mas makabulig pa gid kun magakooperar sa imbestigasyon ang mga nakasaksi sa insidente, ginikanan kag ang mga menor de edad nga involved.
Suno sa iya, ginalikawan ang exposure sang itsura sang mga kabataan agud nga sila ang protected.
Ginasiguro naman sang NAPOLCOM nga ini ang masunod kadungan sang paghimo sang ila nga function.
Suno sa regional director, magahimo sila sang nagakaigo nga tikang ilabi na kun mahatagan sila sang bastante nga panahon agud nga maatubang ang affected parties kag ang ginareklamo nga pulis.
Sa karon, indi pa sila makahimo sang judgment bangud wala pa nakit-an ang ebidensya.
Agud nga madeterminar kun may yara sang probable cause sa kaso, magapatigayon sang hearing ang NAPOLCOM agud pamatian ang respondent kag affected parties tubtub nga makahimo sang rekomendasyon ang regional director.
Sa karon, nakadepende na sa Philippine National Police kun pareporton sa duty ang pulis ukon indi samtang wala pa ang pormal nga imbestigasyon.
