Pabor ang pinuno sang National Police Commission (NAPOLCOM) Region 6 sa pagpatigayon sang regular nga neuro-psychiatric test sa mga katapo sang kapulisan.
Nahibaluan nga ginafinalize na sa karun sang Health Service sang Philippine National Police (PNP) nga magpatigayon sang Psychiatric-Psychological Exam (PPE) sa tanan nga police personnel sa tunga sang mga kaso sang grave misconduct sang pila ka mga police officers.
Kun sa diin pinakaulihi diri amo ang kaso sang isa ka police sergeant nga imbulbado sa shooting rampage sa sulod sang Manila Police District headquarters.
Ginpahayag ni Philippine National Police (PNP) Chief, Police General Guillermo Lorenzo T Eleazar nga ang Health Service recommendations ang igalakip sa pagsulundan nga igaobserbar sa regular assessment sang emotional kag mental health state sang mga kapulisan.
Suno kay Eleazar, ginakonsiderar sini ang pagpatigayon sang Psychiatric-Psychological Exam (PPE) kada tatlo katuig bilang kabahin sang effort sa pagpasanyog sang general welfare sang PNP personnel ilabi na ang imbulbado sa ground operations.
Sa interview sang Bombo Radyo Bacolod kay Atty Joseph Celis, ginpahayag sini nga pabor ini sa ginadihon nga pagpatigayon sang regular nga neuro-psychiatric test sa mga kapulisan bangud komplikado man ang mga trabaho sang mga ini.
Ginalantaw man sini nga mahimo nga nakapoy na ang mga pulis sa ila trabaho, nagakaipit ang mga ini sa ila trabaho ukon mahimo man nga may paglaglaganay sa trabaho gani nagakatabo ang kaangay sa shoot out sa Manila Police District nga nagresulta sa kamatayon sang duha ka mga police personnel.
Suno kay Celis, dapat nga disciplinado, may kortesiya, may commitment kag prinsipyo ang mga kapulisan.
Nagpanugyan man ang pinuno sang NAPOLCOM 6 sa mga kapulisan nga magpakabakod sa pihak sang mga patilaw.
Kasubong man nga ginpahayag ni Celis, nga indi pag baliwalaon ang interview bangud paagi diri mahibaluan ang personalidad kag kalidad sang tawo nga mangin pulis.
Suno pa diri, ang dapat nga kuhaon nga mangin kabahin sang hanay sang kapulisan amo ang may dedikasyon kag may prinsipyo.
Nagpasalamat man ini nga nagistrikto na ang recruitement process sang PNP.
