Madugangan sang masobra P900 million ang budget sang Negros Occidental Provincial Government gikan sa National Tax Allotment para sa 2025.
Sa statement ni Negros Occidental Governor Eugenio Jose ‘Bong’ Lacson, nagtaas sang 18 percent ang NTA sa masunod nga tuig.
Paathag sang gobernador nga may pagsaka na sang 5.66 percent sa P5.4 billion budget subong nga 2024 kun ipaanggid sang 2023, samtang ginalantaw naman nga magadangat sa P5.8 billion tubtob P6 billion ang provincial budget sa 2025.
Pahayag ni Lacson nga nabawi na sang probinsya ang kapierdihan sang magluntad ang pandemic.
Pasalig sini nga padayunon sang probinsya ang mga maayo nga programa kaangay sang farm to market roads kag pasakaon man ang assistance sa mga Barangay.
Gikan sa karun nga P250,000, ginalantaw sang gobernador nga ini ang pasakaon sa P300,000 kaangay sa budget allocation antes paman ang pandemic.
