Magapatigayon ang transport group nga Piston sang isa pa ka strike humalin Setyembre 23 tubtob 24 agud pamatukan ang Public Transport Modernization Program (PTMP).
Suno sa Piston, imbolbado sa nasambit nga transport strike ang transport group nga Manibela kag magapabutyag sang mga demands kaangay sang pagbasura sang PTMP, pagkanselar sang forced franchise consolidation, renewal sang prangkisa kag registrations para sa tanan nga public utility vehicle (PUV) operators lakip na ang mga indi luyag magconsolidate, zero budget para sa PUV phaseout programs kun sa diin ang pondo ang igaredirect sa rehabilitation sang traditional jeepneys kag subsidies para sa local industries kag pagpahanugot sa mga magasulod sa franchise consolidation nga magwithdraw.
Madumduman nga ginbasura ni President Ferdinand Marcos Jr. sang Agosto ang panawagan sang 22 ka mga Senador agud suspendihon ang programa bangud sa ginalantaw indi supisyente nga information drive sang PTMP kag financial burden sa mga drivers kag operators agud magprocure sang modern jeepneys.
