Magapatigayon sang nationwide simultaneous active threat drill ang Bacolod City Police Office sa tanan nga mga eswelahan sa ciudad, alas-9:00 sa Martes sang aga, Agosto 25.
Sa interview sang Bombo Radyo kay Bacolod City Director Col. Eugene Rebadomia, ginpahayag sini nga sang nagligad pa nga Hulyo nakapatigayon na sila sang active shooter Simulation Exercise (SIMEX) sa mga public schools kasunod sa natabo nga shooting incident sa Tacloban kag sa subong may pila ka pribado nga eskwelahan ang nagrequest nga magpatigayon sang amo nga aktibidad.
Pahayag ni Rebadomia, dako ang epekto sa mga nagakatabo nga mga shooting incident sa mga eswkwelahan bangud na-obliga ang tanan nga eswkwelahan nga magpatigayon sang Simulation Exercise.
Paagi sini, suno kay Rebadomia, ma-educate ang tanan nga estudyante, mga manunudlo kag faculty sa mga eskwelahan kun ano ang dapat himuon kun may matabo nga kaangay nga insidente.
Nagahingyo man ini nga indi paghimuon ang mga kapulisan bilang isa ka threat sa mga estudyante sa baylo ipa-intindi sa ila nga ang mga kapulisan sa palibot sang eskwelahan ang magabulig kag makaprotekta sa ila.
Sa pihak sini, suno kay Rebadomia, ginakilala nila ang direktiba sang DepEd nga indi allowed ang kapulisan sa sulod sang eskwelahan kag sila ang visible lang gid sa gwa.
Pasalig sini sa publiko nga handa ang kapulisan nga magresponde kag nagpanugyan nga magtawag sa emergency hotline 911 kun may maeksperyensyahan nga bisan ano nga emerhensya sa sulod sang eskwelahan.
