Nag-umpisa na ang pagpatigayon sang transport strike sang pila ka mga transport group sa Bacolod City subong nga adlaw Abril 15 bilang protesta batok sa mataas nga presyo sang gatong.
Ginalantaw nga mangin pinakadako ini nga rally sang mga driver kag operator sa syudad bangud indi na nila masarangan pa ang padayon nga pagsaka sang presyo sang gatong.
Sa interview sang Bombo Radyo Bacolod kay United Negros Drivers and Operators Center (UNDOC-PISTON) Secretary General Eric Bendoy, ang protesta ang patigayunon sa apat ka area sa syudad lakip na sa Bata Flyover, Magsaysay Flyover sa Singcang, sa bahin sang Talisay City, kag sa Bangga Patyo, Burgos Extension.
Ila ipanawagan nga mabalik sa mas nubo nga presyo ang gatong agud may ara pa sila sang iginansya.
Ginpahayag ni Bendoy nga bisan wala sila sang permit sa rally, ginpasalig niya nga mangin matawhay ang ipatigayunon nga protesta gani nagapanawagan sila sa kapulisan sang paghangup kag pag-intindi sa ila nga sitwasyon.
Ginapanawagan man sang grupo sa nasyonal nga gobyerno nga maghimo sang solusyon sa krisis sa langis nga makapamaayo sa tanan bangud tanan apektado sini.
Ang pagtililipon sang tatlo ka dalagko nga transport sector ang nag-umpisa alas alas-6:00 subong nga aga kag magatakop alas-5:00 karun sa hapon.
Ginkumpirmar man sang presidente sang Bacolod Alliance of Commuters, Operators, and Drivers (BACOD-Manibela) nga nag-upod ang ila grupo sa ginapatigayon nga nationwide transport strike.
Ang transport strike ang updan man sang KNETCO nga ginapangunahan sang ila Presidente nga si Lilian Sembrano nga magaplastar sa Magsasay Flyover sa bahin sang Barangay Singcang-Airport kag UNDOC Piston nga magaplastar sa Bangga Patyo.
Sa interview sang Bombo Radyo Bacolod kay Rudy Catedral, nag-umpisa ang transport strike kaina alas 5:00 sang kaagahon kag ini ang matapos alas 6:00 karun sa gab-i.
Suno kay Catedral, nagapangayo siya sang pasaylo sa mga maapektuhan apang nagpanindugan ini nga ang ila nga ginahimo ang para sa tanan.
Magluwas sa panawagan nga kakason ang excise tax sa gasolina kag krudo, nagapanawagan man ang mga ini sa gobyerno nga mapasakaan man ang sweldo sang mga mamumugon agud nga sila ang makapasaka man sang pletehan bangud tuman nagid kamahal ang presyo sang produktong petrolyo.
Aminado man ini nga wala na sila nakakuha sang permit sa patigayunon nga transport strike.
