Ginakaayo na sang contractor ang porsyon sang pika-pika sang esplanade sa Barangay Taculing, Bacolod City nga narumpag kadungan sang pila ka adlaw nga pag-ulan.
Sa interview sang Bombo Radyo Bacolod kay Engr. Leah Jamero, assistant district engineer sang Bacolod City Engineering District, ang contractor ang responsable sa pagrepair ang pika-pika bangud naguba ini sa sulod sang warranty period.
Aminado si Jamero nga naghumok ang duta sa lugar bangud pila na ka adlaw nga naga-ulan.
Suno kay Jamero, wala sang kabilya ang pika-pika bangud proteksyon lang ini sa pangpang sang sapa nga ginconstruct sang layer by layer gani mahimo nga na-saturate sang madamol nga ulan gani nagcollapse.
Ini man ang ulihi nga gin-ubra bangud diri nagsaka ang mga equipment sang natapos na ang proyekto.
Sang ginatukod ang proyekto suno sa iya, ginacheck sang project engineer ang construction kag material nga ila gingamit gani nakapasar ini sa standard.
Matapos nabalitaan nga natiphag ang pika-pika, gilayon nga ginpahibalo ang contractor nga MKU Construction kag gin-mobilize naman nila ang ila equipment pakadto sa area agud nga mapatigayon ang repair.
