Igapaidalum pa sa laboratory examination ang mga natipon nga ebidensya gikan sa nasunog nga commercial establishments sa Luzuriaga-Locsin Street, Barangay 37, Bacolod City sang Domingo.
Suno kay Fire Chief Inspector Rodel Legaspi, fire marshal sang Bacolod City Fire Station ginbalikan nila ang scene agud nga makatipon sang ebidensya kaangay sang mga debris, abo, kag mga nabilin nga kuryente nga igapaidalum pa sa laboratory examination nga ginalantaw sang mga ini nga mahimo makabulig agud madeterminar ang ginhalinan sang kalayo.
Madumduman nga ang sunog ang nag-umpisa humalin alas-8:33 sang aga kag napalong alas-4:00 na sang hapon.
Suno kay Legaspi, sa inisyal ila na nga nadeterminar nga nagikan sa 2nd floor sang Jean’s Botique ang kalayo kag naglaton sa katupad nga Wanli Marketing ukon Good Choice.
Santo sa ila nga personal nga assessment, nagadangat sa P20 million ang nangin kahalitan gikan sa duha ka commercial establishments apang sila ang nagahulat pa sang mga datos gikan sa ginrequest nga affidavit of loss agud ma-account ang kabug-usan sang balor sang mga stocks nga gintupok sang kalayo.
Suno kay Legazpi, dako ang posibilidad nga electrical in nature sang ginsuguran sang kalayo.
Nasunog ang 2nd kag 3rd floor sang Jean’s botique nga nagaserbe nga stock room sang commercial establishment samtang ang 3rd floor sang Wanli Marketing naman nga amo ang pinakanahalitan, amo ang ginahamtangan sang bulk sang mga stocks.
