Halos isa na ka tonelada ang kable sang kuryente ang natipon sang Task Force Spaghetti Wires matapos sang masobra isa ka semana nga pagresume sang operasyon.
Madumduman nga nagbalik ang operasyon sang task force matapos ang Masskara Festival 2024 celebration sa pagpanguna ni Councilor Psyche Marie “Pao” Sy, chairperson sang Committee on Public Works sa Sangguniang Panlungsod.
Sa interview sang Bombo Radyo Bacolod kay Sy, lapit na lamang magdangat sa 900 kilos ang natipon nila nga spaghetti wires.
Madumduman nga sa pagresume una nila nga gintutukan ang Lizares-Lacson street.
Suno kay Sy, subong nga semana, sila ang magafocus sa Luzuriaga Street gikan sa Bangga San Juan tubtob sa Lopez Jaena.
Madumduman nga kabahin sa nasambitan nga dalan ang nagagulumon nga mga kable sang kuryente sa bahin sang downtown area.
Sila ang naga-operar apat ka adlaw sa kada semana.
Matapos ang clearing operations kada adlaw, ang mga kable ang ginatipon sang Bacolod Environment Natural Resources Office (BENRO).
Suno kay Sy, ginalantaw pa nga mahimo ihatag ang mga natipon nga spaghetti wires sa mga pumuluyo nga makagamit sini para sa palangabuhian ukon mahimo man nga ihatag sa mga mangunguma.
Paathag sang konsehal nga padayun man ang monitoring sang Bacolod City Police Office sa kinawatay sang kable bangod mahimo gamiton nga oportunidad sang mga kawatan ang clearing operation agud magpakuno-kuno nga lehitimo nga katapo sang Task Force Spaghetti Wires.
Panawagan sini sa mga pumuluyo nga kun nagaduda kun otorisado ang mga nagapangbaklas sang kuryente, mahimo nga makig-angot sa police stations ukon sa telecommunication companies agud matumod kun may-ara gid man sang legitimate clearing operations.
