Nagdangat na sa 128 ka mga tents ang natukod sa tent city nga ginpahamtang sa Barangay 3, Himamaylan City, Negros Occidental.
500 ka mga tents ang plano nga ipahamtang sa nasambit nga lugar.
Nahibaluan nga ang tent city ang para butangan sang mga dugang nga mga evacuees sa tion nga magsaka sa Alert Level 4 ang Bulkan Kanlaon.
Suno kay Office of the Civil Defense (OCD) – Negros Island Region Director Donato Sermeno III, as of February 3 nagdangat sa 128 ang na-install nga tents ini bangud nga nagpadala sang augmentation ang Philippine Army agud nga magbulig sa pag-install.
Nagpadala ang Philippine Army sang reservist, boyscout kag dugang military personnel kag ang ciudad sang Himamaylan ang nagsponsor sa pagkaon sang mga ini.
Suno kay Sermeno, ginalantaw nga sa katapusan sang Pebrero mainstall na tanan nga 500 ka tents sa tents city kun magamaayo kag padayon lang ang operasyon.
Suno diri nagapadayon man ang ground improvement sa tent city gamit ang heavy equipment kun sa diin may mga drainage na kag nabutangan naman sang linya sang kuryente.
Samtang ang masunod naman nga target ang pagbutang sang water system distribution.
Ginpahayag man sini nga katapo man sang 94th IB ang nagahatag sang seguridad sa parameter sang tent city kag ang katapo sang 94th Engineering Brigade ang didto man nagatinir kag ginatimingan lang kag ginabanta nga indi init ang pagubra sang mga tents.
Samtang ginalantaw man nga ang mga local government units sa gihapon ang magahatag sang pagkaon sa mga evacuees sa tent city.
