Natalana nga pasakaan sang kaso ang natumod nga facilitator sang Online Sexual Abuse and Exploitation for Children (OSAEC) sa Bacolod City.
Sa interview sang Bombo Radyo Bacolod kay Police Captain Wilma Silva, Head sang Women and Children Protection Desk-Negros Island Region (WCPD-NIR) nga nakilal-an ukon na-identify na nila ang isa ka persona nga gina-alegar posible facilitator sang OSAEC sa Bacolod City kag napreparar na nila ang kaso nga ipasaka batok diri.
Suno kay Silva, ang gina-alegar nga suspek amo ang isa ka babayi nga residente man sang ciudad.
Suno diri, ang 14 nga na-rescue nga mga biktima ang yara na sa paghinakop sang Department of Social Services and Development (DSSD) kag nagapadayon sa pagtuon agud indi sila madisplace.
Suno sa WCPD-NIR Head bangud 14 ang biktima, 14 counts sang kaso ang ipasaka batok sa facilitator kag ini ang OSAEC case kag Qualified trafficking.
Sa karon, ginahanda na sang WCPD-NIR ang kaso nga ipasaka sa persona kag padayon pa gihapon ang imbestigasyon kon sin-o pa ang iban nga facilitator kag mga imbolbado sa pagpang-abuso sa mga kabataan.
Mensahe ni Silva sa mga ginikanan nga bantayan gid ang mga kabataan agud nga indi mangin biktima sang pagpang-abuso bangud nakita nila nga rampant ang Online Sexual Abuse and Exploitation for Children (OSAEC) sa karun sa ciudad.
