Blangko sa gihapon ang National Bureau of Investigation (NBI) sa kun sin-o ang mga suspetsado sa pagpatay kay Provincial Consultant on Hospital Operations Marton Cui.
Sang Abril 12, 2021, naggwa si Marton Cui sa iya opisina kag manugsakay na kuntani sa salakyan upod ang iya duha ka body guard.
Nabatian sang mga body guard ang hinali nga pag-aragoy sang biktima kag nakita nalang ini nga may igo na sa dughan.
Wala sang nabatian nga lupok ang mga body guards.
Ginapatihan nga naggamit sang sniper kag silencer ang suspetsado gani wala sang mabatian nga lupok sang armas.
Samtang wala naman matumod kun sin-o ukon pila ang may kahimuan sang krimen.
Ang biktima ang ginhingagaw pa dala sa San Carlos City Hospital takna alas-8:05 sang gab-i, apang gindeklarar nga dead on arrival.
Sa interview sang Bombo Radyo kay NBI Bacolod Head Atty. Renoir Baldovino, wala sa gihapon sang lead ang mga otoridad sa kun sin-o ang nagpatay kay Cui.
Suno diri, wala gingrant sang mga korte sa La Carlota, San Carlos kag Bacolod City ang ila petition para sa isa ka cyber warrant.
Suno sa iya, kun nagrant kuntani ang ila petition, ila ini pagagamiton sa pagkuha sang cellphone nga ginapatihan ginapanag-iyahan sang isa sa mga suspetsado, kag makaangkon na sila kuntani sang lead.
Suno diri, may yara sila sang impormasyon nga may pagbayluhanay sang tawag sa mga suspetsado gamit ang cellphone sang sila ang nagaplano pa sang krimen kag kinahanglan sang cyber warrant agud ila mabuksan ang gadget sang mga technical experts para sa laboratory investigation.
Sa karun nagadangat sa P2 million ang reward nga gin-offer sang provincial government sa kun sin-o man ang makatudlo sa mga suspetsado.
