Nagtender sang iya irrevocable resignation si National Bureau of Investigation (NBI) Director Jaime Santiago.
Sa letter nga ginpadala kay President Ferdinand “Bongbong” Marcos Jr. kag kay Executive Secretary Lucas Bersamin, ginpahayag ni Santiago nga siya ang magabiya na sa pwesto sa tion nga may mapangalanan na nga magabulos sa iya.
Nahibaluan nga si Santiago, anay trial court judge, prosecutor kag Manila police officer, ang gin-appoint bilang NBI Director sang Hunyo 2024.
Sa letter, gindayaw sini ang kampanya ni Marcos batok sa kurapsyon, kag gindumdom nga sa pagbaton sini sang pwesto sa ahensya, nangin challenge sini ang pagpapas sang scalawags sa NBI.
Suno diri, nagsugod ang pagpangguba sa iya pangalan sang siya ang magsumiter sang courtesy resignation kaangay sa iban nga opisyales sang gobyerno, sunod sa mandato ni Presidente Marcos matapos sang eleksyon.
Pahayag sini nga siya ang padayun nga ginagub-an sang mga detractors kag may interes sa iya nga pwesto.
Paninduhan ni Santiago nga indi sini tugutan nga ang reputasyon nga iya ginpangabudlaya sa madugay nga tinuig ang mahigkuan lamang sang mga pato-pato nga akusasyon.
Ginpasalamatan man sini ang Presidente kag nagpromisa nga padayun nga magasuporta sa administrasyon.
