Ginpanindugan sang National Bureau of Investigation (NBI) nga responsibilidad sang Senado nga ipresentar si Senator Ronald “Bato” dela Rosa bangud yara ini sa idalom sang ila protective custody.
Suno kay NBI Director Melvin Matibag, klaro ang responsibilidad sang senado sa pagpagwa sang senador nga nagapangatubang sang pag-aresto.
Kadungan sini, gin-anunsyo ni Matibag nga nagpagwa na sang direktiba si Presidente Ferdinand “Bongbong” Marcos Jr. sa mga ahensya sang gobyerno.
Ginmando sang Presidente nga siguraduhon nga mangin patas ang dalagan sang imbestigasyon kag manabat ang tanan nga indibidwal nga mapamatud-an nga guilty sa nasambit nga insidente.
Dismayado si Matibag kun matuod nga wala na sa Senado si Dela Rosa.
Suno kay Matibag, “masubo” ang nangin resulta sang insidente bangud ginalauman sini nga respetuhon ni Bato ang ila pag-istoryahanay.
Suno sa opisyal, nagapati ini nga bilang respected nga mga opisyales, katungdanan sang mga senador nga amligan indi lamang ang ila mga kaupdanan kundi pati man ang mga kasuguan kag ang Konstitusyon.
Ginpabutyag man sang direktor ang sentimyento sang mga ahente sang NBI nga posible nga “staged” ang nagluntad nga kinagamo sa Senado agud mahatagan sang tsansa si Bato nga makapalagyo.
Ginpaathag ni Matibag nga ila mandato nga siguraduhon nga madakpan ang sin-o man nga may arrest warrant, ilabi na nga anum na ka bulan nga nagapanago ang senador humalin sang Nobyembre 2025.
Apang ginatugyan sang NBI sa Department of Justice (DOJ) ang masunod nga desisyon kag judgment sa kaso bangud sila ang nagapanguna nga ahensya nga nagapanguna sa operasyon.
