Bisan wala pa sang nabaton nga reklamo angot sa dummy accounts sa Facebook, may panugyan ang National Bureau of Investigation para sa mga social media users.
Sa interview sang Bombo Radyo Bacolod Atty. Renoir Baldovino, pinuno sang NBI Bacolod District Office, ginpahayag sini nga mahimo nga makig-angot sa ila opisina ang mga tawo nga nabiktima sang dummy accounts agud madocument kag mahatagan sang nagakaigo nga tikang ukon maimbestigaran.
Sa tion nga kinahanglanon sang technical support suno kay Baldovino, irefer ini sa cyber crime division sang NBI.
Nagpanugyan man ini nga masami mag-ilis sang password kag indi magpost ukon magsend sang indi maayo nga mga litrato sa Facebook agud indi mahack ang account.
Sa tion naman nga maggamit sang facebook sa desktop ukon laptop, ugalion man ini nga ilog-out pagkatapos gamit.
Samtang nagpanugyan man ang cybercrime investigator sang NBI nga mangin alerto sa tanan nga tion agud malikawan nga makawat ang personal nga impormasyon ukon malikawan nga mabiktima sang identity theft.
Suno kay Special Investigator Willam de Arca, sa tion nga nabiktima sang phising ukon gingamit ang personal identity sa paghimo sang account, iscreenshot ini gamit ang laptop ukon desktop agud makuha ang URL kag IP address.
Ini agud nga matrace sang Cybercrime Division ang ginpost sang suspetsado kun sa diin magaisyu ini sang certification nga nag-exist ang post sa tion nga nadelete na ini sang gintsekyar sang mga imbestigador.
Suno kay de Arca, nakadepende sa load sang cybercrime division ang kadasigon sang pagrelease sang certificate.
