Ginpahayag ni NBI Director Melvin Matibag sa nagapadayon nga impeachment trial batok kay Vice President Sara Duterte nga may yara na sang mga persons of interest ang ila nga ahensya nga posible nga makatudlo sa tawo nga gina-alegar nga na-estorya ni Vice President Sara Duterte agud magpatuman sang pagpatay kanday President Ferdinand “Bongbong” Marcos Jr., First Lady Liza Araneta-Marcos, kag anay House Speaker Martin Romualdez.
Madumduman nga ginpahayag ni Vice President Sara Duterte nga kung may mapatay sa iya gina-alegar nga nagpasugot man ang nakaestorya sini nga patyon man ang first couple kag anay House Speaker.
Suno kay Matibag, posible man nga isa sa mga persons of interest nga ini ang mismo nga nakaestorya sang Bise Presidente.
Apang, nagpamalibad ini nga ibuyagyag ang identity bilang proteksyon sa mga informants kag para ini maapektuhan ang imbestigasyon.
Ang nasambit nga pahayag ang kabahin sang Article IV sang impeachment complaint nga nagatalakay sa gina-alegar nga grave threats kag inciting sedition.
Nauna na nga ginpahayag sang NBI nga ang mga pamahog ni Duterte ang isa ka “serious, active, kag continuing threat” nga may potensyal nga magtuga sang aktwal nga pamahog sa national security.
Sa kabug-usan, ang pagtuhaw sang mga persons of interest ang nagadugang sang bug-at sa imbestigasyon sang NBI kag mahimo nga mangin liyabi sa pagbuyagyag sang kamatooran sa mga alegasyon batok kay Vice President Sara Duterte.
