Ginrekomendar sang National Bureau of Investigation (NBI) ang pagpasaka sang tatlo ka kaso nga grave threats kag isa ka count sang inciting to sedition batok kay Vice President Sara Duterte.
Kasunod ini sang gina-alegar pagpamahog kay President Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Wala ginbaton sang NBI ang paathag sang Bise Presidente nga “conditional” lamang ang threat to kill sini.
Suno sa NBI, maathag sa konteksto sang iya mga pahayag nga tuyo sini nga magpamahog.
Magluwas diri, ginrekomendar man sang ahensya ang kaso nga inciting to sedition may kaangtanan sa mga pahayag ni Sara Duterte sang Oktubre kag Nobyembre 2024 sa tion sang online press briefing, sa diin ginpahayag nga nagpabutyag ini sang tuman nga kaakig sa gobyerno kag sa mga opisyal sini.
Nakasambit sa affidavit sang NBI nga ang mga pahayag sang Bise Presidente ang makatuga sang pagkadismaya sa gobyerno kag magtulod sa publiko nga pamatukan ang mga otoridad.
Suno sa pila ka mga katapo sang House Committee on Justice, mahimo magserbe nga importante nga ebidensya ang affidavit sa impeachment proceedings batok kay VP Sara.
