Gindis-armahan na ang intelligence officer sang National Bureau of Investigation (NBI) Bacolod nga nagpagwa sang iya service firearm samtang nagaestorya sa waiter sang isa ka ilimnan sa 18th Lacson Street syudad sang Bacolod.
Ini nga insidente ang nakuhaan sang close-circuit television camera (CCTV) footage nagligad nga Nobyembre 24 sang kaagahon.
Sa interview sang Bombo Radyo Bacolod kay Atty. Renoir Baldovino, wala man ginsuspend si Janna Marie Navales bangud nagapadayon pa ang imbestigayon sang Regional Internal Affairs Division (RIAD).
Suno pa kay Baldovino, ang findings sang Regional IAD ang isumiter sa central office sang NBI-IAD nga amo ang magadesisyon sa kaso kag sa karun nakaofficial leave si Navales.
Madumduman nga santo sa reklamo sang waiter nga si John Carlo Jison , alas 11 sang gab-i sang si Navales kag mga kaupdanan sini ang naga-inom sa restobar tubtub mag Sabado sang kaagahon.
Sang magbiya na ang grupo, nagbalik si Navales kag ginsugilanon ang waiter may kaangtanan sa iya nabilin nga jacket kag cell phone.
Ginpanindugan sang waiter nga wala sang nabilin nga jacket kag cellphone sa restobar apang samtang nagaestorya si Navales, nakita sa CCTV nga gindala sini ang iya jacket pagwa kag ang firearms sini nga gintago niya sa iya likod.
