Nagpositibo sa gunpowder residue ang isa ka volunteer sang National Bureau of Investigation (NBI) nga gin-aresto may kaangtanan sa nagluntad nga pagpangluthang sa sulod sang Senado, santo sa Southern Police District (SPD) kagab-i.
Suno kay SPD Public Information Office chief Police Lt. Margaret Panaga, base sa ginpatigayon nga eksaminasyon, “positive sa presence sang gunpowder” ang suspek nga ginkilala nga si alyas “Mel Oragon.”
Gin-aresto ang suspek matapos ang insidente kag ginpaidalom sa inquest proceedings bangud sa mga kaso nga paglapas sa Republic Act 10591 ukon Comprehensive Firearms and Ammunition Regulation Act, alarm and scandal, direct assault, trespass to property, kag paglapas sa security protocols sang Senado.
Madumduman nga natabo ang insidente sang Miyerkules sang gab-i sa sulod sang ikaduha nga panalgan sang Senado samtang nakapaidalom ini sa lockdown, nga nagtuga sang kinagamo sa sulod.
Santo sa inisyal nga imbestigasyon, isa ka indi matumod nga kalibre sang armas-luthang ang gingamit sang suspek sa pagpalupok sang makapila ka beses sa sulod sang Senate compound sa GSIS area pasado alas-7:00 sang gab-i.
Samtang, ginpanindugan sang abogado kag asawa sang suspek nga siya amo isa ka driver lamang sang isa sa mga NBI operatives kag indi regular nga empleyado sang ahensya.
