Lunsay nga gin-abi abi ni Bacolod City Mayor Greg Gasataya kag Negros Occidental Governor Eugenio Jose “Bong” Lacson ang mga atleta kag delegado sa opening sang Negros Island Region Athletic Association Meet (NIRAAM) 2026 nga ginpatigayon sa Panaad Park and Stadium sa Barangay Mansilingan, Bacolod City kahapon, Marso 1, 2026.
Sa mensahe ni Gasataya, nakahibalo ini sang ginhimo sang mga atleta nga preparasyon gani nagpanugyan ini nga ini na ang tion agud nga ipakita ang ila abilidad sa hinampang kag himuon ang kutob sa masarangan bangud ang mga ini ang magarepresentar sa bug-os nga Negros Island Region sa Palarong Pambansa.
Suno kay Gasataya ang ciudad ang padayon sa paghatag sang suporta bangud nagapati ang mga ini nga ang masunod nga olympians ang magagikan sa Negros Island Region ilabi na sa Bacolod City.
Ginpasalamatan sini ang Department of Education kag gin-abi abi ang mga atleta sa pagbukas sang regional meet.
Samtang, gin-abi abi man ni Lacson ang mga opisyales nagikan sa tagsa ka Local Government Unit sa Negros Island Region nga nag-upod kag nagsuporta sa tagsa ka atleta opening sang NIRAAM 2026.
Sa mensahe ni Lacson sa mga atleta nga may yara lamang ang mga ini sang pito ka adlaw para pamatud-an ang ila nga mga kaugalingon nga sila ang nagakadapat nga mangin tiglawas sang Negros Island Region para sa Palarong Pambansa sa Agusan Del Sur sa May 2026.
Nagpanawagan man ini sa mga coaches kag trainers nga yara sa ila mga kamot ang maayo nga kondisyon sang mga atleta sa paghampang sa regional meet agud nga mangin tiglawas sa national meet.
Nagalaom man ang gobernador nga magaenjoy ang mga ini sa ila nga pagtinir samtang nagapadayon ang regional meet sa ciudad sang Bacolod.
Nagapati man ang gobernador nga bisan bag-o lang ang rehiyon sa Palarong Pambansa maga-excel ang mga atleta.
