Karun nga pila nalang ka adlaw ang nabilin kag adlaw na sang Eleksyon, Mayo 9, 2022, liwat nga nagpanawagan ang gobernador sa Negros Occidental sa mga kwalipikado nga botante sa probinsya nga maggwa kag magboto.
Suno kay Negros Occidental Governor Eugenio Jose “Bong” Lacson, indi dapat uyangan ang kinamatarong nga makapili sang masunod nga lideres sa pungsod, probinsya, syudad kag banwa.
Apang pahanumdom sini nga matapos ang Mayo 9, dapat nga respetuhon kun ano man ang mangin resulta sang eleksyon.
Ini bangod may mga nagalapta nga impormasyon nga hinali magdaog ang isa ka kandidato, may magaluntad nga pagprotesta.
Sa pihak nga bahin, ginpasalig naman sang Armede Forces of the Philippines (AFP) kag Philippine National Police (PNP) nga kontrolado na nila kag ginabantayan ang mga lugar nga ginakabig areas of concern partikular na sa mga may nagluntad nga engkwentro sa tunga sang tropa sang gobyerno kag New People’s Army (NPA).
Ang mga nagaluntad nga engkwentro ang ginalantaw naman nga resulta na sang pagsecure sang militar kag kapulisan sa mga interlands antes ang eleksyon gani naka-atubang sang mga ini ang rebelde nga grupo.
Ginaseguro naman sang militar nga ila bantayan ang mga polling places nga nahamtang sa mga nabukid na nga bahin sang probinsya agud malikawan ang election-related violence.
Kabahin man sa mga pagsinapol sang Comelec ang Department of Health (DOH) ilabi na nga may mga dugang nga tikang nga pagabuhat sa adlaw sang piniliay may kaangtanan sa paglikaw sa COVID-19 transmission.
Panugnyan ni Governor Lacson nga magpauli nalang gilayon matapos ang pagboto kag hulaton nalang sa tagsa ka puluy-an ang mangin resulta sang piniliay.
