Nagalaum sa gihapon si Negros Occidental Governor Eugenio Jose ‘Bong’ Lacson nga magbag-o ang panindugan sang Local Government Unit sang Silay City nga maghatag sang Resolution of No Objection sa Bulk Water Supply project sang probinsya.
Madumduman nga sang gindihon ang proyekto may yara sang private partnership apang wala na ini ginpadayon bangod mahal ang bayaran sa rate sa supply sang tubig.
Nagpabutyag ang LGU sang Silay City nga mahal ang P24 per cubic meter nga balayran kag amo nga nagdesisyon ang provincial government nga indi na lamang magkuha sang pribado nga partner kag solohon na lang ang P1.1 billion nga proyekto.
Bangod sini nanaog sa P14 per cubic meter ang balayran.
May yara na sang isa ka ektarya nga duta sa Brgy Guimbala-on nga subject for convertion agud mangin intake point kag ginpasalig na nga ang Silay ang mangin host sang proyekto apang tubtob sa karun wala sa gihapon naggrant sang RONO ang ciudad.
Suno sa gobernador ang kapasidad sang Embang river yara sa 400 Megaliters per Day kag ang ginapangayo yara lamang sa 24 Megaliters per Day.
Suno diri, mismo si Provincial Administrator Atty Rayfrando Diaz personal nga nagpadulong sa LGU para ipa-athag ang plano.
Pahayag ni Lacson, wala sini ginbutangan sang malisya ang desisyon sang LGU apang indi mahimo nga madugayan ang proyekto kag dapat may yara na sang desisyon nga madihon.
