Kadungan sa pagpagwa sang Executive Order No. 22-08 series of 2022 nga naga-extend sang Alert Level 2 status sa COVID-19 sang Probinsya sang Negros Occidental, ginpagwa man kahapon ni Governor Eugenio Jose “Bong” Lacson sa EO ang pagtapna sang posibilidad nga pagsulod sang bird flu sa probinsya.
Suno kay Negros Occidental Provincial Veterinarian Dr. Renante Decena, may kumpirmado na nga kaso sang bird flu sa Pampangga kag Bulacan.
Santo sa EO, magapatuman sang temporary total ban ang Negros Occidental sa pagsulod sang tanan nga wild kag domestic live birds, karne sang mga pispis kasubong man ang semen kag higko sang mga ini gikan sa bisan diin man nga bahin sang Pilipinas.
Ang tenmporary total ban ang nag-umpisa sa pag-epekto kahapon Pebrero 28 tubtob na sa Marso 15, 2022.
Sa kumpirmasyon sang provincial veterinarian, ang panibag-o nga bird flu virus ang ginatawag Highly Pathogenic Avian Influenza A (H5N1).
Ini ang mas may malala nga mortality rate nga yara sa 100 porsyento sa sulod lang sang 48 oras.
Suno kay Decena, ang virus ang gindala sang mga migratory birds kun sa diin ang nareport nga mga kaso ang gikan sa pogo sa Pampanga samtang sa bebe naman ang sa Bulacan.
Suno diri, Setyembre tubtob Abril ang period of migration kun sa diin nagalabay man ang mga ini sa mga banwa sang Pulupandan, Ilog, San Enrique kasubong man sa syudad sang Sagay, Escalante kag Sipalay.
Pasalig naman sang Provincial Veterinary Office nga wala pa sila sang namonitor nga positibo matapos ang ila nga pag-extract sang mga blood samples gikan sa pila ka mga lokal nga pispis.
Suno kay Decena, kasunod sang EO malauman naman nga magahugot ang pagbantay sa mga seaports kag airports.
Samtang nagpahanumdom man ini sa mga magapauli nga breeder, seller ukon handler sa Negros Occidental ilabi na sa mga magatambong sa Game Fowl Expo sa Pasay City nga paligarun anay ang tatlo ka adlaw antes maghikap sang manok ukon magpadulong sa mga manukan bangod mahimo nga ang virus ang ara lang sa mga panapton.
