Padayon ang klase sang mga kabataan pinaagi sa online kag modules class kasunod sa pagsuspend sang klase bangod sa pag-ulan nga dala sang tropical storm Kristine.
Sa interview sang Bombo Radyo Bacolod kay Ian Arnold Arnaez, public information officer sang Department of Education (DepEd) division of Negros Occidental, basta may yara sang suspension sang face to face class ginahanda ang printed modules nga ipanagatag sa mga estudyante, samtang ang iban naman ang nagapatigayon sang online class.
Suno diri, kun ano man ang lesson nga ginatudlo subong nga semana dapat nga mapadayon ini agud nga masunod ang sequence sang lessons nga tun-an.
Panugyan sini sa mga ginikanan nga indi pagpalagawon ang mga kabataan apang sila ang tudluan kag patun-on sang ila klase.
Subong nga adlaw, ginkansela ang klase sa banwa sang Hinoba-an, Moises Padilla, EB Magalona, kag ciudad sang Kabankalan, Talisay, Silay kag Kabankalan.
Samtang sa banwa sang Calatrava, ginkansela ang klase tubtob sa Huwebes bangod sa nagluntad nga engkwentro.
