Nag-atras ang Negros Occidental Provincial Government sa pagbakal kuntani sang duha ka ektarya nga duta nga natukuran sang Central Philippine State University sa Barangay 7, Moises Padilla, Negros Occidental.
Ini matapos nga wala mapakita ang pila ka ginapangayo nga mga legal documents, kalakip na ang titulo sang duta kasubong man nga nagabag-o bag-o ang presyo.
Nahibaluan nga ang nagapanag-iya sang apat ka ektarya nga duta amo si former Moises Padilla Mayor Francisco Nazareno.
Nahibaluan nga nag-expire na ang deed of usufruct ukon pagpahanugot sa paggamit sang CPSU sa duta sang 2017.
Kasunod sini, ang tag-iya ang nagapanukot na sang bulanan nga bayad sa paggamit sang duta, kag bangod indi masarangan, ang eskwelahan ang nagpalapit sa provincial government.
Una na nga nagkasugot sang P25 million nga balor para sa duha ka ektarya nga amo lamang ang natukuran sang eskwelahan, kag may napain naman nga budget.
Ang transaksyon ang nasuguran antes paman ang 2025 Midterm Elections, apang ginpa-untat bangod sa Comelec banning, kag ginresume lamang sang matapos na ang eleksyon.
Apang nagbag-o ang pinsar ni Nazareno kag ini ang nagdemand na sang mas mataas nga presyo.
Sa interview sang Bombo Radyo Bacolod kay Provincial Administrator Atty Rayfrando Diaz, ginpadal-an na lamang nila sang sulat si Nazareno nga magaback-out na ang provincial government.
Suno kay Diaz, wala nagakooperar ang anay alkalde kag kaangay nga nagapangharras pa.
Suno diri, wala man nila ginpakita ang kopya sang titulo sang duta, indi kompleto ang ginhatag nga TIN number kag wala man nagpirma sa deed of sale ang asawa.
Paathag ni Diaz nga kun napakita ang land title, kag nabutang didto nga single ownership lamang ni Nazareno ang propedad, wala sang problema, apang kun married kag ini ang conjugal property, kinahanglan gid ang pirma sang asawa.
Suno kay sa Provincial Administrator, nga indi pagbatunon sang BIR kun kulang ang TIN number, gani indi nila mabayaran ang Capital Gain Stocks.
Ginrekomendar na lamang sini kay Negros Occidental Governor Eugenio Jose “Bong” Lacson, ang pagpangita sang lain nga duta, agud may masayluhan ang CPSU.
