Nagapadala sang mga family foodpacks ang Negros Occidental Provincial Social Welfare and Development Office sa nagkalainlain nga local government units nga may-ara sang evacuees kasunod sang paglaslas sang Bagyo TINO.
Sa interview sang Bombo Radyo Bacolod kay PSWDO Head Chiqui Gonzales, ang prayoridad sa alokasyon amo ang mga yara sa sulod sang evacuation centers.
Nahibaluan nga madamo na sang mga nakapauli kag kalabanan sa mga nabilin nga evacuees amo ang mga wala nagid sang mapuy-an bangod sa pagkaguba sang ila nga mga balay.
Sa karun sila ang padayun sa preparasyon kag repacking sang mga food packs.
Sila ang una na nga nakapanagtag sang 2,701 family foodpacks.
Ang nahatagan ang ginalakipan sang Isabela nga may 407, Bago City nga may 335 allocations, 720 sa Pulupandan, 400 sa San Enrique, 302 sa Pontevedra kag 407 sa Binalbagan.
Sila ang nagtalana naman sang 4,000 family food packs nga mapanagtag para subong nga adlaw.
Ang kada family food packs ang naga-unod sang lima ka kilo nga bugas kag walo ka nanarisari nga delatas.
May ara man sang ginapanghatag nga hygiene kits.
Luwas sa family foodpacks gikan sa PSWDO, separado pa ang family foodpacks gikan sa Department of Social Welfare and Development nga derekta nga ginapadala sa mga LGUs.
Plano man nila nga mag-install sang StarLink agud may-ara sang internet access sa mga evacuation sites nga derekta na sa satellite.
