Naglawig pa ang negosasyon sang kapulisan sa pulis nga nagluthang-patay sa iya kahagugma sa Purok Camia, Barangay Poblacion, Valladolid, Negros Occidental kagab-i, nga gilayon man nag-utas sang kaugalingon nga kabuhi.
Ang pulis ang ginkilala nga si Police Master Sgt Larry Junio, 40 anyos, residente sang Barangay Doldol, Valladolid apang assigned sa Iloilo City Police Station 5 sa Mandurriao, Iloilo City samtang ang babayi ang ginkilala nga si Maicah Redil, 33 anyos.
Sa interview sang Bombo Radyo Bacolod kay Roda Manzano, si Redil ang tiya sang adaptiba sang iya manghod, kag temporaryo lamang nga nagapuyo sa balay.
Ini ang may apat ka kabataan, kun sa diin lain ang amay sang una nga duha nga 14 anyos kag 10 anyos, samtang nagtaliwan naman ang dentista nga amay sang 4 anyos kag sila sang pulis ang may bata man nga isa ka tuig.
Samtang si Junio ang kasado man kag may kabataan.
Suno kay Manzano, alas-4:00 pa lamang kahapon sang hapon nagabaisay na ang duha, apang mas mabaskog ang pagpamuyayaw sang babayi.
Bangod sila ang yara lamang sa kaingod nga balay, nabatian niya nga hana maglakat ang pulis apang nagbalik bangod yara kay Redil ang yabi, kag indi sini pag-ihatag.
Pagdangat sang alas-7:42 sang gab-i, didto na sila nakabati sang tatlo ka lupok.
Wala naman sini nabatian pa ang kasunod nga mga lupok bangod siya ang nagpanago na.
Sa una palang nga lupok, ang 10 anyos sini nga bata ang naghingagaw gwa bitbit ang isa ka tuig sini nga manghod kag pakadto pakari nga nagapangayo sang bulig bangod sa pahayag nga gintiro ang iya mama.
Pahayag sini nga sa pag-abot sang kapulisan, inoras pa ang ila negosasyon kay Junio kag kalakip sa nagahaylo sa iya ang pakaisa sini.
Dugang pa ni Manzano nga nagakabatian pa ang pagpangayo sang tabang sang babayi.
Pag-abot ni Valladolid Mayor Enrique “Bebot” Miravalles, didto na nadesisyonan nga pwersahon nga sudlon ang balay.
Nabudlayan pa sa pagsulod ang kapulisan bangod nagbalabag ang tiil sang pulis sa piyertahan, kag nabatian sini ang pahayag sang pulis nga “patay na si sarge.”
Gindala pa ang duha sa ospital apang gindeklarar nga dead on arrival.
Tuman naman ang kaluoy sini sa mga nabilin nga bata, nga sa karun yara na sa kustodiya sang Department of Social Welfare and Development.
