Nagdugay sang kapin tatlo ka oras ang negosasyon sang kapulisan sa Canadian national nga nagbuno-patay sa iya Pinay nga asawa, antes sini ginbuno ang iya kaugalingon sa ila nga balay sa Villa Mikaela, Alice Street, Barangay Singcang Airport, Bacolod City, kahapon sang aga.
Sa interview sang Bombo Radyo kay Jonathan Aballe, isa sa mga nagresponde sa lugar, pasado alas 6:00 sang aga sila ang nagresponde sa balay kag si Bobby, ang utod sang biktima nga si Liezel St. Jean.
Ini matapos sila ang ginkadtuan ni CJ kag ginsugiran nga naga-away si Liezel nga bana sini nga si Ronald St. Jean.
Nagtawag ang mga ini sang barangay tanod kag ang tanod ang nagtawag naman sang pulis.
Suno kay Aballe, ara ini sa front door apang bangud nga bukas ang bintana, iya gintuki ang kurtina kag nakakita ini sang dugo sa sala.
Suno sa iya, sang ila nakit-an ang dugo, nag-atras sila nga duha ni Bobby, tiyo ni Liezel, bangud wala pa ang mga pulis kag wala ang mga ini nakahibalo sang sitwasyon bangud sarado ang kwarto.
Pagkatapos sang 15 ka minutos, nag-abot na ang mga pulis.
Suno diri, sang ila nasulod ang balay, wala na sang kabuhi si Liezel samtang may uyat naman nga kutsilyo kag tear gas si Ronald.
Suno sa iya, nagdangat sa tatlo ka oras ang negosasyon kag ginhambalan ini sang pulis nga mangin kalmado bangud siya ang buligan apang nagpahayag ini nga indi niya kinahanglan sang bulig kag luyag lamang sini nga mapatay.
Antes ini, gintawag pa ni Ronald ang tiyo ni Liezel nga si Bobby kag ginbinlan sang mga papeles para sa iya mga kabataan.
Sa ikaduha sini nga pagpatawag kay Bobby, ginkulbaan pa ang tiyo bangud may uyat ini nga kutsilyo kag nagahana apang iya ini ginbuno sa iya kaugalingon.
Suno kay Aballe, tinutuyo kuntani sang kapulisan nga luwason si Ronald nga buhi agud indi makaangkon sang konflikto sa Canadian embassy.
