Ginpanindugan sang chief executive officer sang Metro Bacolod Chamber of Commerce and Industry (MBCCI) nga rekomendasyon lamang ang mahimo sang Regional Wage Board tuhoy sa wage increase.
Sa interview sang Bombo Radyo Bacolod kay Frank Carbon, luyag sini mapaathag nga sala ang naggwa nga impormasyon nga aprubado na sang Regional Wage Board Region 6 ang P40 nga wage increase para sa Western Visayas.
Panindugan sini nga recommending body lamang ang Regional Wage Board kag ang National Wages Commission amo ang naga-aprubar.
Samtang antes mapatuman, magakinahanglan pa sang 15 dias nga publication.
Suno kay Carbon siya mismo ang nagrepresentar sa business sector sa ginpatigayon nga public hearing sang Oktubre 21.
Apang matapos ang public hearing, ginpahayag sang Regional Wage Board nga sila ang may desisyon na, nga kaangay nga wala ginpaminsaran.
Panindugan ni Carbon nga sa pagdesisyon sang wage increase, dapat ikonsiderar ang dominant industry sa isa ka rehiyon, kaangay sa Region 6 nga nakasentro sa Agrikultura.
Suno diri ang Western Visayas ang may pinakamataas nga inflation rate sa bilog nga Pilipinas kag kalabanan sa mga yara sa sektor sang agrikultura ang namiyerdihan bangod sa mga kalamidad.
Suno diri, halos wala na sang income ang mga mangunguma, kag indi masarangan ang pagpasaka sang P40 sa sweldo.
Ini ang magaresulta sa pagpanubo sang working hours, pagbuhin sang empleyado ukon pagpanirado sang negosyo.
Dugang pa ni Carbon nga dapat man tsekyaron ang sitwasyon sang iban nga rehiyon nga may lain nga industriya kaangay sa Cebu, nga mas dominante ang commercial ukon manufacturing.
Suno diri ang minimum wage sa Cebu ang P501 samtang P468 sa Western Visayas.
Gani kun magsaka sang P40, maggwa nga mas mataas pa ang sweldo sa Region 6.
Sa pihak sini, dapat ipaanggid ang rate sa kaangay nga dominant industry kaangay sa Davao City, nga yara sa karun ang minimum wage sa P450.
Panindugan ni Carbon nga ang business sector ang batok sa pagpasaka sang sweldo, kag kun ini ang ipatuman, ini ang ipapas-an man gihapon sang negosyante sa konsumedor pinaagi sa pagpasaka sang presyo sang produkto ukon serbisyo.
Ini bangod wala sang negosyante nga magapadayun kun sila ang mamiyerdihan lamang.
