BACOLOD CITY-Gin-abduct sang wala pa nakilal-an nga mga suspetsado ang isa ka negosyante nga Muslim sa ciudad sang Bacolod kagab-i.
Pasado alas-9:00 kagab-i samtang nagalakat pauli sa ila boarding house ang biktima nga si Ontao Sacar, 64-anyos kag iya asawa nga 30-anyos sang sila ang ginbanggaan sang pula nga SUV sa Mambuloc, Brgy. 10 kag pilit ini nga ginpasakay sa salakyan.
Muslim businessman nga gin-abduct sa Bacolod, nasapwan nga patay
Sa interview sang Bombo Radyo Bacolod sa asawa sang biktima, pagkaguwa nila gikan sa ila store sa 888 Premier nagpanyapon sila sa isa ka fastfood chain sa tabok lang kag pagkatapos naglakat pauli sa ila boarding house sa Brgy. 10.
Nahibaluan nga nagabaligya ang mag-asawa sang celllphone accessories sa nasambit nga mall kag nangin presidente man sang una ang biktima sang asosyan sang mga Muslim vendors sa lugar.
Suno sa asawa, duha ka lalaki nga naka-jacket kag naka-bonnet kag may dala nga high powered firearms ang nagkuha sang iya bana kag nagpasakay sa salakyan.
Wala naman sang matumod nga rason ang asawa kun nga-a gin-abduct ang iya bana bangud suno diri, mabuot man ini.
Walo katuig na sila nga naga-upod apang wala sila sang bata.
Madugay naman nga naga-istar sa Bacolod ang biktima kag gikan ini sa Marawi City.
Nagahilibion pa ang asawa nga nagapangayo sang bulig nga makita ang iya bana bangud plano pa niya ini kuntani nga ipa-check up subong nga adlaw bangud nga may balatian ini sa tagipusuon.
Suno pa diri, wala man nakatuad sa iya ang iya bana nga may nagakabaton ini nga mga pamahog.
Samtang gilayon man nga nagpatigayon sang follow-up operation ang Bacolod Police Station 2 matapos ang gina-alegar abduction.
Suno kay Police Major Sherlock Gabana, commander sang Police Station 2, gilayon niya nga gin-alarm ang iban nga police stations sa Bacolod agud makapatigayon sang dragnet operation matapos gin-alegar gindala sang wala nakilal-an nga mga armado nga lalaki ang negosyante.
Suno sa station commander, ginatumod pa nila ang motibo sa insedente.
Gindugang man ni Gabana nga nabatian na niya sang una ang ngalan sang biktima sang siya pa ang hepe sang Police Station 7.
Ginkanselar naman lang gani sang Police Station 2 ang natalana nila kuntani nga buybust operation kagab-i agud matutukan ang insidente.
