Ginaduso sang Bacolod Filipino Chinese Community nga mangin adopted son ukon honorary mayor sa ciudad sang Bacolod ang negosyante nga si Lucio Co para sa subong nga tuig.
Sa interview sang Bombo Radyo Bacolod kay Councilor Jason Villarosa, chairperson sa Committee on Tourism sa Sangguniang Panlungsod, ginbatun na nila ni Councilor Al Victor Espino, ang chairperson sa Committee on Laws ang resolusyon, apang ginakinahanglan pa nila sang brief background kag rasun kun ngaa ini ang nagakadapat nga himuon nga adopted son ukon honorary mayor sa subong nga tuig.
Suno kay Villarosa, nagtawag na sa iya si Stephen Sy, ang presidente sa Bacolaodiat 2024 agud mangayo sang letter sang ila nga pagbatun sa item.
Ini bangod ang kopya ang igapadala kay Lucio Co, bilang pagpangayo sang mga detalye sang investments sini sa ciudad sang Bacolod kasubong man ang mga future investments.
Ang pagkilala kay Co bilang adopted son ukon honorary mayor sa ciudad sang Bacolod ang kabahin man sang preparasyon sa nagahilapit na nga Bacolaodiat Festival 2024 nga sa santo sa tentative date, patigayunon sa Pebrero 10 subong nga tuig.
Sa pihak nga bahin, gikan sa P3 million nga budget sang 2023, ini ang gindugangan ni Bacolod City Mayor Alfredo “Albee”Benitez sang P2 million gani nagdangat na ang budget sa Bacolaodiat Festival 2024 sa P5 million.
