Patay ang isa ka negosyante samtang nasamaran ang asawa matapos mabungguan sang truck ang ila motorsiklo sa Hacienda Esperanza, Barangay Poblacion 1, Sagay City, Negros Occidental.
Ang napatay ang ginkilala kay Reynaldo Pantol, 31 anyos, negosyante samtang nasamaran naman ang asawa sini nga si Analyn Pantol, 29 anyos kag mga residente sang Barangay Vito, Sagay City.
Samtang ang driver sang truck ang ginkilala nga si Christopher Villacerin, 31 anyos kag residente sang Barangay Rafael-Bararera, Sagay City, Negros Occidental.
Sa interview sang Bombo Radyo Bacolod kay Police Lt Col. Alvimar Flores, hepe sang Sagay City Police Station, ang imbulbado sa aksidente amo ang isa ka Honda Click nga motorsiklo kag JMC truck kag ang mga ini ang gikan sa Sagay City Proper kag padulong sa Escalante City.
Suno kay Flores, ang motorsiklo nga ginasakyan sang mag-asawa ang paliko apang gulpyada man nga nagliko ang truck gani nagluntad ang aksidente.
Ang bana nga driver sang motorsiklo ang napatay samtang ang asawa ang estable naman ang kondisyon sa hospital.
Desidido ang asawa nga magapasaka sang kaso batok sa driver sang truck.
Kahapon gin-inquest naman ang suspek kun sa diin magapangatubang ini sang kaso nga reckless imprudence resulting to homicide, physical injury kag damage to property.
