Patay ang isa ka businessman matapos gintiro samtang nagamaneho sang canter truck sa bahin sang Provincial Road, Hacienda San Benito, Barangay Crossing Magallon, Moises Padilla, Martes sang kaagahon, Nobyembre 10.
Ginkilala ang biktima nga si Reynaldo Disoy, 50-anyos, kasado nga residente sang Brgy San Agustin, Isabela.
Sa interview sang Bombo Radyo Bacolod kay Police Major Ryan Villasario, hepe sang Moises Padilla Municipal Police Station, sa panaysayon sang kaupod ni Disoy alas 3:00 ang takna sang kaagahon, nagbiyahe ang mga ini sakay sa black and white canter truck padulong sa proper sang Moises Padilla agud magbakal kuntani sang mga kasapatan.
Suno kay Villasario, samtang nagamaneho si Disoy pasulod sa proper sang nasambit nga banwa may yara sang nagasunod sa ila nga motorsiklo.
Pag-abot sa bahin sang Hacienda San Benito sa Barangay Crossing Magallon, hinali lang nagpalupok ang suspek.
Ang biktima ang nakaangkon sang igo sang bala sa tiil samtang matapos ang insidente ang suspek nga riding in tandem ang nagpalagyo sa wala matumod nga direksyon.
Suno kay Villasario, gindala pa sa ospital ang biktima apang gindeklarar nga dead on arrival .
Ginalantaw nga blood loss kag may signs of cardiac arrest ang rason sang kamatayon sang biktima apang ginahulat pa sang mga kapulisan ang kumpirmasyon nagikan sa doctor.
Samtang nagapadayon sa karun ang imbestigasyon sang Moises Padilla Municipal Police Station agud nga matumod ang suspek kag motibo sang pagtiro-patay sa biktima.
Ang biktima ang wala man sang kun ano nga record sa Barangay bangud sadto isa man ini kaBarangay Kagawad.
