Patay ang isa ka negosyante matapos nga ginluthang sa Narra Avenue, Barangay Villamonte sa ciudad sang Bacolod kahapon sang hapon.
Ginkilala ang biktima kay Roland Tan, legal ang edad kag residente sang Ayala North Point sa ciudad sang Talisay.
Sa interview sang Bombo Radyo Bacolod kay Police Major Renante Jomocan, hepe sang Bacolod Police Station 4, ginpahayag sini nga masaka na kuntani sa iya nga salakyan ang biktima sang ini ang gintiro sang wala pa makilal-an nga mga suspetsado sa atubang mismo sang iya nga ginapanag-iyahan nga Crown Agri-Trading Corporation.
Gilayon nga gindala si Tan sa ospital apang gindeklarar nga dead-on-arrival.
Suno kay Jomocan, nakaangkon sang lima ka igo sang bala ang biktima lakip na sa iya dughan, dulunggan, abaga kag may naglapos pa gid sa iya guya nga gintunaan sang iya kamatayon.
Ginapahayag sang mga nakakita suno sa hepe nga nagalakat lamang ang tatlo ka mga suspetsado nga nagasuksok sang facemask.
Gilayon man ang mga ini nga nagpalagyo sa nagkalain-lain nga direksyon.
Sa karon suno kay Jomocan wala pa sila sang motibo sa pagpangluthang kay Tan.
Plano naman nila nga tsekyaron ang CCTV footage nga nahamtang mismo sa building sini agud makabulig sa imbestigasyon.
Nagapati man si Police Lt. Col. Ariel Pico, tagpamaba sang Bacolod City Police Office nga dako ang nangin papel sang pagdowngrade sang ciudad sa general community quarantine halin sa enhanced community quarantine.
Suno kay Pico, nagatake-advantage ang mga kriminal bangud sa pagkakas sang 27 ka mga inner borders sa ciudad.
Suno sa iya, bag-o lang niya nabatian ang pangalan ni Roland Tan kag wala sila sang background diri magluwas sa negosyante.
Apang nagpasalig ang BCPO nga himuon nila ang tanan agud makilal-an ang mga suspetsado ilabi na kun may yara sang witness kag CCTV.
