Patay ang negosyante sang baboy matapos gintiro sang mga suspetsado nga nagasakay sa motorsiklo sa dalan Araneta, Purok EZ Yulo, Barangay Sum-ag, ciudad sang Bacolod subong nga hapon.
Sa interview sang Bombo Radyo kay Police Lt. Jonito Pastrana, station commander sang Bacolod Police Station 9, ang biktima ang ginkilala kay Randolf Domingo, 38-anyos kag residente sang Purok Alunan Baybay, Barangay 35, Bacolod City.
Santo sa imbestigasyon, nagbakal ang biktima sang baboy sa banwa sang Cauayan kag pabalik na sa Bacolod apang nagpundo ini sa atubang sang gasolinahan sa dalan Araneta agud nga magpangihi.
Pabalik na si Domingo sa iya salakyan sang gintiro sang mga suspetsado nga nagasakay sa motorsiklo samtang nagalakat ini sa highway.
Bangud sa igo sa iya nga ulo, gilayon nga ginbawian sang kabuhi ang biktima nga nagasuksok lamang sang shorts kag lu-ab.
Padayon pa ang imbestigasyon sang Police Station 9 agud matumod ang motibo sa krimen.
Wala naman ginadula ang anggulo nga may kaangtanan ini sa iligal nga druga bangud nadakpan si Domingo sa buybust operation sa Barangay Banago sang tuig 2018 apang nahilway.
